Chris Steyn, beter bekend as Plakkies, het die harte van Suid-Afrikaanse musiekliefhebbers verower toe hy as die wenner van die derde seisoen van Die Kontrak aangewys is. Hierdie twintigjarige musieksensasie het onmiddellik opslae gemaak met sy debuutsnit, kortspeler en musiekvideo, getiteld HELEMAAL, wat die eerste posisie op Apple Music beklee het binne ure ná vrystelling. Nou is Chris terug met ’n splinternuwe dansliedjie.
“Plaas Dorp Toe” – ‘n Nuwe Dansliedjie
“PLAAS DORP TOE,” geskryf deur Chris met die hulp van Georic Lomas en Marco van Deventer van die musiekgroep ONS, is sopas uitgereik. “Dit gaan speels oor hardwerkende boere wat verdien om ook ’n bietjie te rus, so ek nooi hulle dorp toe vir ’n lekker kuier,” verduidelik Chris.
Volgens Chris plaas die liedjie hom in ’n nuwe styl, en hy is opgewonde om te sien hoe die mense daarop gaan reageer. “Dit is ’n baie lekker ‘upbeat’ liedjie en ek dink die mense sal aanklank vind met die lekker ‘vibe’,” sê hy.
“Dit is wel ’n lekker kuier liedjie, vir almal, nie net die boere op hulle plase nie, maar ook vir die stadsjapies wat lus kry vir ’n lekker aandjie saam vriende,” voeg Chris by. “Die mense behoort dit by ’n braai of by ’n kuier te speel, met die klem op ’n lekker tyd.”
Verfilming van die Musiekvideo
Die musiekvideo vir “PLAAS DORP TOE” is in ’n yskoue Brits deur Conrad Theron en sy span by Atlas Media verfilm. “Ons het op die plaas Model Pak verfilm en al hulle boere was goedgunstig deel van die musiekvideo. Dit was vir my baie ‘cool’ gewees om hulle almal te ontmoet en stories te deel.”
‘n Huldeblyk aan Hardwerkende Boere
Chris vertel verder dat hierdie liedjie wat die boere ’n kuier-kans wil bied ook spesiaal is omdat hy voel die boere verdien ’n drankie. “Die boere werk baie hard om die kos wat ons eet in die winkels te kry en ons moet dankbaar wees vir hulle,” sê Chris.
Toekomsplanne en Optredes
Alhoewel Chris nog aan die begin van sy musiekloopbaan staan, is hy reeds een van die besigste kunstenaars in die bedryf. Hy vat elke dag en geleentheid stap vir stap en nooit vanselfsprekend nie. Hy is veral opgewonde om weer by Afrikaans is Groot in November op te tree en hoop dat sy liedjies die luisteraars in ’n goeie bui kan sit en dat hulle sal kuier en dans op al sy musiek.
Luister en Kyk “Plaas Dorp Toe”
“PLAAS DORP TOE” is nou op alle digitale stroomdienste soos Apple Music, Spotify, Deezer en YouTube Music beskikbaar. Kry dit hier: https://chrissteyn.lnk.to/plaasdorptoe
Die musiekvideo vir “PLAAS DORP TOE” kan nou op YouTube gekyk word. Kry dit hier: https://youtu.be/3VjcyjQCoPc
SOSIALE MEDIA
